اللعب مع الكبار 2...

cheb manai

عضو فريق عمل المنتدى العام

ايا نقولوا صحة شريبتكم ..وتقبل الله صيامكم وقيامكم وبارك في اعمالكم واقوالكم لمافيه الخير للبلاد والعباد ..وبعد حكايتي مع اللعب مع الكبار راهي مازالت طويلة ..قولوا مسلسل مكسيكي والا تركي مدبلج ..الله اعلم عندها نهاية والا في كل نهاية تفتح بداية ..حقيقة لست ادري دوافع شغفي وتعلقي باللعب مع الكبار ..اليوم عندي بنوتة صغيرة عمرها حاشاكم خمسة سنوات اسمها الشابة مناعية ..كيف بوها ..قربت بجانبي وبدات تتدحنس عليا وقالت اشبيك يابابا ما تلعبشي معايا ؟؟ اشبيك من الخدمة للكمبيوتر ؟ اخي فاش قاعد تكتب كل يوم ومخليني نلعب وحدي مع الصغار؟؟ تفاجات وضحكت وقلت حتى بنتي طالعة كيف بوها تحب تلعب مع الكبار ..وقلت لها " برا ايعيش بنتي الباهية العب مع الصغيرات اللي كيفك ..توا انا واياك قد قد ؟؟ انت صغرونة ماكي فاهمة شيء من الدنيا ..خلي حتى تكبري توا تعرفي اللعب مع الكبار..وخلي بوك ربي يقدره ويعينه في العابه اليومية اللي نبدا فيها من الدار للعطار والخضار والجزار ونختمها في الادارة ...ايا قلت ان شاء الله خير ماهو يقولوا " ان شاء الله فالكم عند صغاركم " وبرا عاد دوب ما دخلت للمؤسسة اللي غبت عليها بسبب حاشاكم هاك الانفلونزا الملعونة ..بدا السلام وبدا الكلام وغابت الكابوسان والطعام ..واول خبر ياجماعة سمعته نقل بالجملة ..تحويرات وتغييرات في الادارات ..ايا اش علينا ..قولولي مديرنا ..عرفنا نقلوه والا مازال ؟؟ قال لي واحد من الاخوة " اخي ما سمعتش ؟ ماهو سايي ..طاروا بيه ..دعي الى مهام اخرى ..وبرا ازرب روحك شوية وبارك للمسؤول الجديد وخوذ بايك من الاول في الترحيب والتبشبيش وكان لزم اقلب فيستك واعرف مع اشكون باش تلعب مستقبلا ..جاتني ضحكة ..تذكرت لعبتي اللي ما كملتشي في المنام ..قلت هذه البداية ومازال مازال ..هاو هذه اللعبة اللي ما شفتهاش في الحلم ...وما كتبتش عليها في تونيزيا سات ..زعما صحيح ياجماعة القول هذا"تبديل السروج فيه راحة؟؟؟ والا نلعبوا ونجربوا ؟
والا نشدوا في هاك القول " اللي تعرفه خير من اللي ماتعرفوش؟؟
والله احترت ..رغم اللي الواحد تعود على الروتين وولى يسري في دمه ..حتى اللي اصبحنا نشوفوا في الروتين قالب معين تعودنا عليه وتعود علينا وولينا ندعوله بالبقاء والديمومة وربي لايقطع علينا عادة ولاعوايد ..وسيستمر اللعب مع الكبار باذن الله تعالى ....._يتبع..